Materi 1 Sambrama Wacana
PAPLAJAHAN 1
|
SAMBRAMA WECANA
|
A. Teges Sembrama Wecana
Sambrama Wecana inggih punika bebaosan sané katlatarang sané daging lan tetueknyané ngenenin indik nyanggra utawi nyapa para undangan ring sajeroning upacara adat, agama miwah acara sané lianan.
Wenten makudang-kudang soroh Sambrama Wecana manut tatacarane maktayang makadi:
· Sembrama Wecana Dadakan, inggih punika ri kala maktayang Sambrama Wecana nenten nganggén téks, riantukan sang sané nyanggra undangan (sané maktayang Sambrama Wecana) nadaksara kasudi mangda nyanggra para undangan.
· Sembrama Wecana Kawacen, inggih punika Sambrama Wecana sané sampun kaparidabdabang, sampun maduwé téks, tur ri kala maktayang Sambrama Wecana ngawacén téks, riantukan sang sané maktayang Sambrama Wecana punika sampun jangkep sareng naskah sané jagi kawedarang .
· Sembrama Wecana Kaapalang, inggih punika Sambrama Wecana sané sampun kaparidabdabang, sampun maduwé teks, tur sampun kaapalang, raris ri kala maktayang Sambrama Wecana sang sané ngawedar Sambrama nénten nganggén téks utawi ngawacen téks / lisan.
· Sembrama Wecana Ringkesan, inggih punika Sambrama Wecana sané sadurung kabaktayang sampun nyiagayang naskahnyané sané marupa sesuratan unteng-unteng Sambrama Wecana kéwanten.
B. Wangun Sembrama Wecana
Sajeroning makarya Sembrama Wecana patut uning indik tata cara ngaryanang Sembrama Wecana punika sakadi :
1. Murda
Murdan Sembrama Wecanane mangda anut ring topik sane jagi kabaktayang.
2. Pamahbah
Pamahbah patut madaging pangastungkara, Pangrastiti ring Ida Sanghyang Widi, matur pangayubagia majeng ring para undangan sané sampun ledang rauh.
3. Daging
Daging Sambrama Wecana, mangda anut ring topik acara sané kamargiang mangda para undangan tatas uning ring indik lan pamargin acarane.
4. Pamuput
Pamuput patut madaging panyuksma majeng ring para undangan sané sampun prasida rauh micayang uratian lan pangrastitine majeng ring acara sané kemargiang, matur nunas pangampura antuk kakirangan ri kala nyanggra para undangan, taler panyineb antuk parama santi.
C. Tetikes Sembrama Wecana Wénten agem-ageman ri kala maktayang Sambrama Wecana, sané kawastanin tetikes makadi :
· Wicara inggih punika kawagedan utawi kawikanan ring sajeroning indik daging bebaosan (penguasaan materi). Rikala maktayang Sembrama Wecana bebaosane patut manut ring topik Sembrama Wecana sané kabaktayang, mangdané prasida nudut kayun para uleman sane miragiang.
· Wirasa inggih punika kewagedan sajeroning ngaresepang lan ngerasayang daging bebaosan (menghayati). Ritatkala maktayang Sembrama Wecana kacihnayang antuk pangrasa mangdané para uleman sané sampun rauh rumasa bagia santukan sampun kasanggra becik.
· Wiraga inggih punika semita lan laras (gerak tubuh) sang sané maktayang Sembrama Wecana, mangda anut ring daging sembrama sane kabaktayang
· Wirama inggih punika intonasi suara, vokal, tanjek bebaosan rikala maktayang Sembrama Wecana mangda anut ring punggelan lengkara, punika sane ngawinan lengut kapiragi.
Imba Sambrama wecana
Komentar
Posting Komentar